أنا طوبة الثورة

أنا طوبة الثورة

وشهرتي مالية الدنيا

ومعروفة ف كل فيديو

واسأل عني الثوار

أنا كنت ف الميدان

وشالني م الشبان

ونشن ع الجبان

اللي ماسك الزنات

شافني وبالنشان

بس كان خيبان

شفت الدم سايل

ف الميدان

قلت ها انتقم

ولما اتشلت بعزم

واتحدفت بعيد عن القصد

بكل همة اتجهت

وغيرت المسار وحددت

هدقي بكل دقة

وصبته بكل همه

دماغه نزفت دم

ورمى الفرفر وفر

مش مصدقني ياغر

روح للفيديو و بص

تلاقيني ف كل لقطة

بعد كده ضربوا بي الوتد

اللي ربطوا قيه الخيم

وحطوني ع الستاير

علشان أمنع البوادر

الريح  اللي بتلم

أي حاجة وتطير الكل

وكمان حوطوني بالطوب

اخواني

عشان يولعوا للآكل

ويتجمع كل محبوب

آكلهم كان واحد

وهدفهم كان واحد

إن الريس يباعد

ولما اتنحى واتنا زل

بقى يثبتوا الساري

بي عشان العلم

يرفرف ويعلى

ويغنوا بلادي

ولما يحبوا يشربوا

يعملوا زير وعليه غطا

ويحطوني فوق الغطا

عشان امنعه م الردى

من الريح المعدية

وصوروني كام صورة

وظهرت مسرورة

عشان كده أكيد

أنا قررت أكيد

إني أترشح أكيد

للرئاسة وها أفيد

ها نعدي

ها نعدي

ونبني

ونعلي

ونرجع

العلم يعلى

ونقف تاني

علشان الغالي

لازم يعدي

القمح ف سنابله

كمل بصفاره

والقطن فتح

والبنات بتسرح

وراه وتشرح

اللوزه من حبه

والقصب ناصب

عوده زي زمان

الكل عرقان

جبينه عرقان

وشه عرقان

علشان الغالي

الكل ها يفديه

الكل ها يرويه

ومين الغالي

 وطني الغالي

مصر بتنادي

لبوا يا أولادي

الصانع تدور

لازم تدور

والمدَن تدخن

والمدَن تكبر

الله اكبر

على اللي يخون

على اللي يقبض

بكل دولار

علشان يملى

كرشه ويبقى

من أصحاب القروش

ويزرع بلاوي

فتن وحكاوي

ومليونية ياغاوي

بلا داعي

يبان للعيان

يا خسارة يا ولادي

تبيعوني بالبالي

وأنا ربيتكم بالغالي

نسيتوا اسمي

واسميتوا أفرنجي

طيب يا ولادي

ليه حد تاني

ولادي رجالتي

بيحبوني وها يبنوا

الف سد غالي

والف مجد تاني

والف مصنع يدور

والمدن ها تعلى

والمدن هاتسمع

اذان أعلى

الله أكبر

كل واحد

كل واحد

كل واحد ف البلاد دي

عاوز ينسب الفضل ويبدي

انه اللي عامل الثورة وهايعدي

بالبلد من السكة اللي بتودي

الواحد وماترجعه سالم يعدي

يقول انه القائد اللي ابتدى

الثورة وفجر الشرارة وهدى

الشعب يخرج ف وش العدا

هو اللي حطم الظلم و اللي هوى

بالحكم اللي رجع الشعب ورا

اللي لولاه بحكمته اللي قال

لازم نهزم الظلم ونحقق المحال

و كده تشجعوه على أي حال

لو دخل المجلس أو اتريس ع الجدعان

والثاني قال انا أول من نادى

وصورت الثورة وشوفوا أفلامي

وما استنيت وخرجت الشرارة

وناديت ياجماعة تعالوا يالله ويانا

كل واحد ف البلد يخطب ف الرجالة

ويقول كلام عن نفسه يوري الشجاعة

بس الشجاعة أما تبقى يا محترم ألاجة

وتقولي الحكم والتاريخ وتقرا للامه

ألأمه مش عاوزه خطب ولا حكمة

الأمه عاوزه ضمير وعمل وذمة

وبلاش الميدان خلوه رمز ووردة

وذكرى جميلة يحكي لأجيال جاية

مش رمز لخراب ودمار أم الدنيا

شوف الطيور لما تبني العش الغالي

تبنيه فوق الشجر هناك ف العلالي

ويسكن ويهدى عشان البيبي الغالي

وانتم كل يوم مظاهرة بلا داعي

ها تودوها  لفين مصر أم الدنيا

هاتبقى ولعة

الدمعة ورا الدمعة

لا قولة أو حكمة شافعة

والناس هناك جامعة

وكل ودانها سامعة

يا لله نروح نهتف واحدة

يسقط المشير وعسكره جامعة

وبعد ما يسقط هانقف جامعة

نهتف هتاف بصوت أعلى

تسقط الحكومة والناس جامعة

وبعد ما تسقط ها تبقى ولعة

هانروح  تاني ونهتف أعلى

تسقط مصر ماليها راجعة

وبعد ما تسقط نهتف أعلى

ونروح لبلد تاني جامعة

نجمع الحشود ونكرر الولعة

مصر بيموتوها

كله في حبك  بيتاجر

كله على موتك بيأجر

كله على دمارك ساهر

والمخلص ف زمانك نادر

نعشك بيجهزوا فيه

والمغسلة بيوضبها كتير

والكفن شاله كتير

والقبر اختلفوا عليه

ندفنها جوه نزورها

ولا بره عشان ننساها

 والي قال جوة ف المسجد

قالوا لا دي للكل أمة

ندفنها ف الشافعي أقرب

رضوا وقالوا ما ينفع

وسوق الجمعة هناك يجمع

ها نتعبها ف الآخرة ونسمع

ودانها شتايم دلوقتي بتسمع

واللي قال ف مايو أبعد

رضوا وقالوا منظر مرعب

ما حدش ها يزور ويقرب.

بنعدي فوق جبل عالي

واللي يوقع ما يقدر يرجع

والي قالوا ع البراني

هناك ها نزورها تاني

واللي قالوا عند السويس أحلى

الترب هناك كتيرة وأنفع

وكده كم مليونية اتعملت

واحدة للدفن الجاني

والتانية عشان البراني

والتالتة الترب القصادي

والرابعة مايو أو الشافعي

وجت مليونية ف العباسية

ترد ع المليونية الاولانية

والمصانع سكن فيها الغراب

والمتاجر قفلت كل الابواب

وكل الحبايب سافروا بعيد

ورفعوا م البطاقة الحبيب

أسم كان يتردد من بعيد

مصري الجنسية بقى غريب

أنا ناموسة

أنا ناموسة وبزن

وما اعرفش غير الزن

وحضرت الثورة وما با أون

ها تقولي كدابة يا جن

ها قولك أنا ف ودان الصغنن

عماله أقول له وازن

وقلت له قوم الكل هايجنن

الشعب م الجوع هايون

والبطالة ملت العين وبتسل

العمر من الناس وبتقل

من الدنيا اللي ها تجن

رحت ف الميدان وبازن

ما تقف عن الهتاف وما تكل

يسقط الظلم اللي أخر

مصر وخلا الشعب يقل

من حبه لام الدنيا مصر

قلل من كله إلا الفقر

وزعه ع الكل بالعدل

وهو ده الحكم ياجن

ورحت للريس هات بازن

اتنحى دلوقتي قبل مايجن

الشعب ويهجم على الكل

يقطع الظالم بالناب والسن

هاتقولوا كدابة وعمالة تطن

طب شوفوا اللي مات واتغير

لسانه بيدعي عليهم ويسل

القول على الظالم ومايون

وعدوا أخواتي كتير ما أمن

وبعد الريس ما اتنحى يافل

رقصت رقصة ورحت أطن

ف ودن الشباب وقلت يا فل

اتحقق الحلم بس الكل

ياريت يعلي الراية ما يكل

يروح يشتغل وبلاش يون

ده انا بعوضة وعمري ما أمل

مات الرجل



مات الرجل واقفا يحمل الأماني


مات الرجل وما كان يرجف أو يبالي


العدى على أبواب القاهرة سهروا الليالي


وبطلنا تنحى يومها وتولى بقول باني


المسئول أنا وسأقف مع الجند حام


مدافعا عن الوطن دافعا له للأعالي


متنحيا عن منصبي لأكن مع شعب غالي


لن يعيد ما سلب من أرض إلا بالجهاد


خرج الشعب كله يهتف التقى بلا ميعاد


ابق ونحن معك نجاهد ضد الباغي


وافق البطل ليعيد بناء جيش غال


ولما حل الشقاق والقتال بين عرب غوال


وكان منصوحا ان يبقى ليشفى من اعتلال


وعندما ذهب ليشفى جاءه خبر الشقاق


فعاد إلى القاهرة مسرعا بلا روية أو اتئاد


ليرقق نسيج مارد ويحييه بعد موات


ولما ودع أمير لإمة راح للبيت يعاني


التقاه ملك الموت فقبض روحه بميعاد


مات البطل لا البطل في الذاكرة باق