قبل ما تتكلم
قبل ما تتكلم عن مصر
إبقى اتطهر م النيل
واشرب منه تبقى جميل
زي حسنها
أما تحب توصف واحدة
حسنها ما ف البر زيه
سمرة وشعرها لوشها زينة
جميل زيها
اما تحب توصف طيبة
وأرض سودة وعتيقة
ونعم كبيرة وكتيرة
مالية حجرها
أما تحب توصف عفيفة
وطاهرة وإيدين نضيفة
وعَرق حباته كتيرة
نازل على خدها
اما تحب توصف مجد
وتاريخ ماله حد
ظاهر على بققها
كل ده وما عرفتش مين
كل ده وبتسأل مين
ليها ف الدنيا والدين
مين زيها
مصر أمان للمحرومين
والجعان ياكل كتير
من أرضها
No comments:
Post a Comment